ការរីករាលដាលជំងឺកូវីដ-១៩ បានកើតមានជាសាកល និងបន្តអូសបន្លាយរហូតមកដល់ពេលបច្ចុប្បន្ន បង្កឱ្យមានការបាត់បង់ការងារធ្វើ និងការធ្លាក់ចុះប្រាក់ចំណូលជាលំដាប់ជាពិសេសប្រជាជនក្រីក្រ និងជនងាយរងគ្រោះដែលមានចំណូលទាប។ដើម្បីសម្រាលការលំបាករបស់ប្រជាជន ដែលរងផលប៉ះពាល់ពីជំងឺកូវីដ-១៩ ជាពិសេសប្រជាជនក្រីក្រ និងជនងាយរងគ្រោះដែលមានចំណូលទាប រាជរដ្ឋាភិបាលកម្ពុជា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានដាក់ចេញអនុក្រឹត្យលេខ ៨៨ អនក្រ.បក ចុះថ្ងៃទី១២ ខែមិថុនា ឆ្នាំ២០២០ ស្តីពីការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩។

រាជរដ្ឋាភិបាលបានអនុវត្តយុទ្ធសាស្រ្តចាកចេញពីកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ ដោយកែសម្រួលទំហំសាច់ប្រាក់ឧបត្ថម្ភចាប់ពីខែមករា ដល់ខែមីនា ឆ្នាំ២០២៤ ស្របតាមអនុក្រឹត្យលេខ ៣៧១ អនក្រ.បក ចុះថ្ងៃទី២៩ ខែធ្នូ ឆ្នាំ២០២៣ ស្តីពីការកែសម្រួលអនុក្រឹត្យលេខ ៨៨ អនក្រ.បក ចុះថ្ងៃទី១២​ ខែមិថុនា ឆ្នាំ២០២០ ស្តីពីការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩។