កម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអាយុក្រោម ២ឆ្នាំ ត្រូវបានរដ្ឋាភិបាលកម្ពុជាដាក់ឲ្យអនុវត្តចាប់តំាងពីថ្ងៃទី០១ ខែមិថុនា ឆ្នាំ២០១៩។ នៅពេលនោះ ក្រសួងសុខាភិបាលជាស្ថាប័នអនុវត្តការចុះឈ្មោះ និងការផ្ទេរសាច់ប្រាក់ជូនអ្នកទទួលផល។

តាមរយៈអនុក្រឹត្យលេខ២៤៥ អនក្រ​.បក ចុះថ្ងៃទី៣១ ខែធ្នូ ឆ្នាំ២០១៩ ស្តីពីការដាក់ឱ្យអនុវត្តកម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអាយុក្រោម ២ឆ្នាំ កម្មវិធីនេះត្រូវបានផ្ទេរមកក្រសួងសង្គមកិច្ច អតីតយុទ្ធជន និងយុវនីតិសម្បទា ជាអ្នកអនុវត្ត។ ចាប់ពីថ្ងៃទី០១ ខែមករា ឆ្នាំ២០២០ ដល់ថ្ងៃទី៣១ ខែមករា ឆ្នាំ២០២០ ក្រសួងសង្គមកិច្ច អតីតយុទ្ធជន និងយុវនីតិសម្បទា ទទួលបន្ទុកការអនុវត្តផ្ទេរសាច់ប្រាក់ជូនអ្នកទទួលផលតែប៉៉ុណ្ណោះ។

ចាប់ពីថ្ងៃទី០១ ខែកុម្ភៈ ឆ្នាំ២០២០ ក្រសួងសង្គមកិច្ច អតីតយុទ្ធជន និងយុវនីតិសម្បទា ទទួលភារកិច្ចអនុវត្តពេញលេញនូវការចុះឈ្មោះ និងការបើកប្រាក់ជូនអ្នកទទួលផល។ ក្នុងនោះមានតួអង្គឃុំ សង្កាត់ ជាអ្នកចុះឈ្មោះ និងមូលដ្ឋានសុខាភិបាលសាធារណៈជាតួអង្គផ្តល់សេវា និងអនុវត្តលក្ខខណ្ឌ។

នៅថ្ងៃទី៤ ខែកក្កដា ឆ្នាំ២០២៣ រាជរដ្ឋាភិបាលបានចេញអនុក្រឹត្យលេខ ១៤៥ អនក្រ.បក ស្ដីពី ការកែសម្រួលកម្រិតប្រាក់ឧបត្ថម្ភ និងលក្ខខណ្ឌនៃអនុក្រឹត្យលេខ ២៤៥ អនក្រ.បក ចុះថ្ងៃទី៣១​ខែធ្នូ ឆ្នាំ២០១៩ ស្ដីពីការអនុវត្តកម្មវិធីឧបត្ថម្ភសាច់ប្រាក់ជូនស្ដ្រីមានផ្ទៃពោះ និងកុមារអាយុក្រោម២ឆ្នាំ។ ការអនុវត្តផ្តល់កម្រិតប្រាក់ឧបត្ថម្ភ និងលក្ខខណ្ឌថ្មីនេះ ចាប់ពីថ្ងៃទី១ ខែសីហា ឆ្នាំ២០២៣។