ដោយផ្អែកតាមភាពមិនច្បាស់លាស់ដែលបណ្ដាលមកពីការរីករាលដាលនៃជំងឺកូវីដ-១៩ ភាពតានតឹងផ្នែកភូមិសាស្ត្រនយោបាយនានា បានបណ្តាលឱ្យមាននិន្នាការកើនឡើងនៃថ្លៃទំនិញ និងម្ហូបអាហារលើទីផ្សារ ដែលធ្វើឱ្យប៉ះពាល់ដល់ជីវភាពរស់នៅរបស់ប្រជាពលរដ្ឋក្នុងគ្រួសារក្រីក្រ និងងាយរងគ្រោះ។ ទោះបីជាស្ថានភាពបច្ចុប្បន្នបានប្រសើរឡើងវិញក៏ដោយ តែអ្វីដែលនៅសេសសល់ក្នុងអំឡុងពេលរាតត្បាតនៃជំងឺកូវីដ-១៩ បានរងផលប៉ះពាល់ទូទាំងពិភពលោក ដែលធ្វើឱ្យប្រជាជនមួយចំនួន បានធ្លាក់ចូលក្នុងបន្ទាត់នៃភាពក្រីក្រ និងភាពងាយរងគ្រោះ និកម្មភាព បញ្ហាសុខភាព កង្វះអាហាររូបត្ថម្ភ និងផលលំបាកជាច្រើនផ្សេងទៀត ដែលរាជរដ្ឋាភិបាលកម្ពុជា និងសង្គមជាតិទាំងមូល ត្រូវរួមគ្នាដោះស្រាយ និងស្តារស្ថានភាពសេដ្ឋកិច្ចឡើងវិញ។ រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានដាក់ចេញនូវកម្មវិធីថ្មី ក្នុងចំណោមកម្មវិធីជំនួយសង្គមផ្សេងទៀត នោះគឺកម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យ ក្នុងអំឡុងពេលមានសម្ពាធអតិផរណា ក្នុងគោលបំណងដើម្បីស្រូបយកសម្ពាធពីការកើនឡើងនៃអតិផរណា។