ទីក្រុងបាលី ប្រទេសឥណ្ឌូនេស៊ី៖ នៅថ្ងៃព្រហស្បតិ៍ ១រោច ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៤ ខែកក្កដា ឆ្នាំ២០២២

ឯកឧត្តម ឈួរ សុបញ្ញា ប្រតិភូរាជរដ្ឋាភិបាលទទួលបន្ទុកជាអគ្គនាយក នៃមូលនិធិជាតិជំនួយសង្គម បានអញ្ជើញ ដឹកនាំប្រតិភូកម្ពុជាចូលរួម កិច្ចប្រជុំកម្រិតខ្ពស់របស់សមាគមសន្តិសុខសង្គមអាស៊ាន (ASSA) ស្តីពីកិច្ចគាំពារសង្គម ក្នុងអំឡុងពេលប្រយុទ្ធនឹងជំងឺកូវីដ-១៩  និងជំហានបន្ទាប់ក្រោយជំងឺកូវីដ-១៩ បានធូរស្រាល។ កិច្ចប្រជុំកម្រិតខ្ពស់នេះគឺជាវេទិកាចែករំលែកបទពិសោធន៍ក្នុងការអនុវត្តរបបសន្តិសុខសង្គមក្នុងបរិបទកូវីដ -១៩ ដែលក្នុងនោះគ្រឹះស្ថាននានាក្នុងតំបន់អាស៊ាន បានលើកឡើងអំពីសមិទ្ធិផលដែលខ្លួនទទួលបាន ក៏ដូចជាការរំពឹងទុកក្នុងវឌ្ឍនភាពការងារបន្តក្នុងការកសាងប្រព័ន្ធគាំពារសង្គមមួយដែលមានលក្ខណៈទូលំទូលាយងាយស្រួលក្នុងការសម្របខ្លួនបត់បែន និងឆ្លើយតបទៅនឹងវិបត្តិសុខភាព គ្រោះមហន្តរាយ។​