រាជធានីភ្នំពេញ៖ ថ្ងៃអង្គារ ទី៩ ខែកក្កដា ឆ្នាំ២០២៤ ឯកឧត្តម ស៊ឹម សុធន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកមូលនិធិជាតិជំនួយសង្គម បានជួបពិភាក្សាជាមួយ ឯកឧត្តម ឧត្តមអគ្គានុរក្សថ្នាក់លេខ១ នុត សវនា អគ្គនាយករង តំណាងដ៏ខ្ពង់ខ្ពស់ឯកឧត្តម អគ្គនាយកពន្ធនាគារ ក្រសួងមហាផ្ទៃ ដើម្បីស្វែងយល់ពីស្ថានភាពស្រ្តីមានផ្ទៃពោះ ដែលកំពុងជាប់ពន្ធនាគារ និងកុមារតាមម្តាយ សម្រាប់ឈានទៅសម្រេចបាននូវប្រសាសន៍ដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា កាលពីថ្ងៃទី៤ ខែកក្កដា ឆ្នាំ២០២៤ នៅវិទ្យាស្ថានគរុកោសល្យរាជធានីភ្នំពេញ ដោយសម្តេចបានចង្អុលបង្ហាញទៅក្រសួងសង្គមកិច្ច អតីតយុទ្ធជន និងយុវនីតិសម្បទា ឱ្យធ្វើការគិតគូរអត្ថប្រយោជន៍ដល់ស្ត្រីមានផ្ទៃពោះ ដែលកំពុងជាប់ពន្ធនាគារ និងកុមារតាមម្តាយ អាចទទួលបានអត្ថប្រយោជន៍ពីកម្មវិធីជំនួយសង្គមជាសាច់ប្រាក់ ដូចទៅនឹងស្រ្តីមានផ្ទៃពោះ និងកុមារអាយុក្រោម២ឆ្នាំ ដែលជាស្រ្តីស្ថិតក្នុងគ្រួសារមានបណ្ណសមធម៌មានសុពលភាព ក៏ដូចជាកម្មវិធីស្រ្តីមានផ្ទៃពោះ និងកុមារអាយុក្រោម២ឆ្នាំ ជាមន្រ្តីរាជការ មន្រ្តីជាប់កិច្ចសន្យា មន្រ្តីកម្មសិក្សា កម្មករនិយោជិតជាស្រ្តី ដែលជាសមាជិក ប.ស.ស. ផងដែរ។