ក្រសួងស្ថាប័នសាមីទទួលខុសត្រូវក្នុងការស្នើសុំប្រាក់សោធនបាត់បង់សម្បទាវិជ្ជាជីវៈ សម្រាប់ជនបាត់បង់សម្បទាវិជ្ជាជីវៈនោះ មកក្រសួងសង្គមកិច្ច អតីតយុទ្ធជន និងយុវនីតិសម្បទា ដោយមាន ម.ជ.ជ. ជាសេនាធិការ។ ដំណើរការរៀបចំសោធនបាត់បង់សម្បទាវិជ្ជាជីវៈ មានដូចខាងក្រោម៖

• ជនបាត់បង់សម្បទាវិជ្ជាជីវៈ និងអ្នកនៅក្នុងបន្ទុកមកសាខា ម.ជ.ជ. រាជធានី ខេត្ត ដើម្បីទាក់ទងព័ត៌មានបន្ថែម ដោយយកមកជាមួយនូវ៖

             + ជនបាត់បង់សម្បទាវិជ្ជាជីវៈ៖ ប្រកាស ស្តីពីការបាត់បង់សម្បទាវិជ្ជាជីវៈ ឬសលាកបត្រព័ត៌មាន                                                                    អត្តសញ្ញាណប័ណ្ណសញ្ជាតិខ្មែរ និងសៀវភៅគ្រួសារ ឬសៀវភៅស្នាក់នៅ។

             + កូនក្នុងបន្ទុក៖ សំបុត្រកំណើត

             + សហព័ន្ធ៖ សេចក្តីចម្លងសំបុត្រអាពាហ៍ពិពាហ៍ និងអត្តសញ្ញាណប័ណ្ណសញ្ជាតិខ្មែរ

• មន្ត្រីការិយាល័យ ម.ជ.ជ. រាជធានី ខេត្ត នឹងជូនដំណឹងពីកាលបរិច្ឆេទនៃការធ្វើបច្ចុប្បន្នភាពរបស់ ម.ជ.ជ. ថ្នាក់កណ្តាលដល់ជនបាត់បង់សម្បទាវិជ្ជាជីវៈ។
• ម.ជ.ជ. ថ្នាក់កណ្តាលចុះពិនិត្យ ផ្ទៀងផ្ទាត់ឯកសារ ថតរូប និងស្កេនម្រាមដៃបញ្ចូលក្នុងប្រព័ន្ធព័ត៌មានវិទ្យា និងផ្តិតមេដៃស្តាំលើឯកសារ បើកគណនីធនាគារសម្រាប់ជនបាត់បង់សម្បទាវិជ្ជាជីវៈ។
• មន្ត្រីផ្នែកព័ត៌មានវិទ្យានៃ ម.ជ.ជ. ថ្នាក់កណ្តាលពិនិត្យ និងផ្ទៀងផ្ទាត់ទិន្នន័យក្នុងប្រព័ន្ធព័ត៌មានវិទ្យា និងរៀបចំប្រាក់សោធនប្រចាំខែ ដើម្បីបើកផ្តល់តាមប្រព័ន្ធធនាគារ។ ករណី មិនមានព័ត៌មានគ្រប់គ្រាន់ មន្ត្រី ម.ជ.ជ. នឹងទាក់ទងជាមួយនិវត្តជន ឬក្រសួងមុខងារសាធារណៈ ដើម្បីបំពេញព័ត៌មានបន្ថែម។
• ជនបាត់បង់សម្បទាវិជ្ជាជីវៈអាចបើកប្រាក់សោធននៅតាមធនាគារដៃគូ ដោយការបើកផ្តល់ត្រូវធ្វើឡើងចំនួន ២លើកក្នុងមួយខែ ដែលលើកទី១ នៅសប្តាហ៍ទី២ និងលើកទី២ នៅសប្តាហ៍ទី៤។