អំពីមូលនិធិជាតិ
ជំនួយសង្គម

មូលនិធិជាតិជំនួយសង្គម គឺជាគ្រឹះស្ថានសាធារណៈរដ្ឋបាល ដោយធ្វើសមាហរណកម្មរវាងអង្គភាពចំនួន៣បញ្ចូលគ្នា គឺនាយកដ្ឋានសុខុមាលភាពសង្គម បេឡាជាតិសន្តិសុខសង្គមសម្រាប់មន្រ្តីរាជការស៊ីវិល (ប.ជ.ស.) និងបេឡាជាតិអតីតយុទ្ធជន (ប.ជ.អ.)។  ការបង្កើតមូលនិធិជាតិជំនួយសង្គមនេះ បានបង្ហាញពីការយកចិត្តទុកដាក់របស់រាជរដ្ឋាភិបាលចំពោះប្រជាជនក្រីក្រ និងងាយរងគ្រោះ ក៏ដូចជាដើម្បីបង្ខិតសេវាឲ្យកាន់តែជិត និងងាយស្រួលសម្រាប់ជូនអ្នកទទួលផល។ ការបង្កើតមូលនិធិជាតិជំនួយសង្គម គឺជាស្ពានចម្លងមួយក្នុងការចូលរួមចំណែកលើកកម្ពស់គុណភាពជីវិត ប្រកបដោយសុខុមាលភាពសម្រាប់ប្រជាជនទូទៅឱ្យមានសុខភាពល្អ

ក្រុមប្រឹក្សាភិបាលមានបេសកកម្មដឹកនាំ និងតម្រង់ទិសអនុវត្តសកម្មភាពការងារ និងធ្វើការត្រួតពិនិត្យលើដំណើរការរបស់មូលនិធិជា​តិ​ជំនួយសង្គម (ម.ជ.ជ.) ក្នុងក្របខណ្ឌបទប្បញ្ញត្តិជាធរមាន។ ក្នុងបេសកកម្មនេះ ក្រុមប្រឹក្សាភិបាលមានតួនាទីពិនិត្យ និងអនុម័តលើផែនការអភិវឌ្ឍរបស់ ម.ជ.ជ. សម្រាប់រយៈពេលមធ្យម និងរយៈពេលវែង បទបញ្ជាផ្ទៃក្នុង គម្រោងថវិកា របាយការណ៍ហិរញ្ញវត្ថុ ផែនការលទ្ធកម្ម របាយការណ៍លទ្ធកម្ម កំណត់ការរៀបចំរចនាសម្ព័ន្ធ កំណត់ក្របខណ្ឌនិងចំនួនបុគ្គលិកប្រចាំឆ្នាំ ជំរុញដំណើរការគណៈកម្មាធិការ និងគណៈកម្មការនានាតាមការចាំបាច់ និងវាយតម្លៃលើលទ្ធផលសម្រេចបានប្រចាំត្រីមាស ឆមាស និងប្រចាំឆ្នាំ ព្រមទំាងលើកវិធានការកែសម្រួលសម្រាប់អនុវត្តបន្តរបស់ ម.ជ.ជ. ដើម្បីរួមចំណែកលើកកម្ពស់ប្រព័ន្ធជំនួយសង្គមនៅក្នុងប្រទេសកម្ពុជា។

ក្នុងនាមជាប្រតិបត្តិករ មូលនិធិជាតិជំនួយសង្គម ប្តេជ្ញាចិត្តខ្ពស់ក្នុងការផ្តល់សេវាប្រកបដោយសុច្ចរិតភាព តម្លាភាព គណនេយ្យភាព ប្រកបដោយសេចក្តីថ្លៃថ្នូរ និងដោយមានការទទួលខុសត្រូវខ្ពស់ចំពោះរាជរដ្ឋាភិបាល និងថ្នាក់ដឹកនាំ។ ប្តេជ្ញាពង្រឹង​​ និងពង្រីកកម្មវិធីជំនួយសង្គម និងរបបសន្តិសុខសង្គមដែលមានស្រាប់ ព្រមទំាងបង្កើតគំនិតច្នៃប្រឌិតថ្មីៗ ដើម្បីជួយលើកស្ទួយកម្រិតជីវភាពរស់នៅរបស់ប្រជាជនដែលមានការលំបាកផ្នែកជីវភាព ឱ្យមានជីវភាពប្រសើរឡើង  និងតាមរយៈការគិតគូរដល់ផលប្រយោជន៍អតីតមន្រ្តីរាជការស៊ីវិល និងអតីតយុទ្ធជន ប្រកបដោយគុណភាព។