គ្រួសារក្រីក្រដែលមានបណ្ណសមធម៌ កម្រិតក្រ១ ឬកម្រិតក្រ២ និងសមាជិកគ្រួសារជាជនងាយរងគ្រោះ អាចចុះឈ្មោះចូលកម្មវិធី ត្រូវមានឯកសារដូចខាងក្រោម៖

• ការឧបត្ថម្ភគោលគ្រួសារ៖ មេគ្រួសារ ឬតំណាងគ្រួសារ ត្រូវមានបណ្ណសមធម៌ច្បាប់ដើម ដែលមានសុពលភាពចេញដោយក្រសួងផែនការ និងអត្តសញ្ញាណបណ្ណសញ្ញាតិខ្មែរ។
• ការឧបត្ថម្ភសមាជិកគ្រួសារជាជនងាយរងគ្រោះ៖

+ ស្រ្តីមានផ្ទៃពោះ និងកុមារអាយុក្រោម២ឆ្នាំ ត្រូវមានបណ្ណសមធម៌ច្បាប់ដើម ដែលមានសុពលភាពចេញដោយក្រសួងផែនការ និងសៀវភៅសុខភាពមាតា (ស្រ្តីមានផ្ទៃពោះជាអ្នកទទួលផល) ឬបណ្ណសុខភាពកុមារ (កុមារជាអ្នកទទួលផល) ចេញដោយមូលដ្ឋានសុខាភិបាលសាធារណៈ។

+ សិស្សានុសិស្ស ត្រូវមានបណ្ណសមធម៌ច្បាប់ដើម មានសុពលភាពចេញដោយក្រសួងផែនការ និងបានបញ្ជាក់ពីការចុះឈ្មោះចូលរៀនពីគ្រឹះស្ថានសិក្សាចំណេះទូទៅសាធារណៈ ក្នុងប្រព័ន្ធបច្ចេកវិទ្យាគ្រប់គ្រងព័ត៌មាន។

+ ជនមានពិការភាព ត្រូវមានបណ្ណសមធម៌ច្បាប់ដើម ដែលមានសុពលភាពចេញដោយក្រសួងផែនការ និងបណ្ណសម្គាល់ជនមានពិការភាពច្បាប់ដើម ចេញដោយក្រសួងសង្គមកិច្ច អតីតយុទ្ធជន និងយុវនីតិសម្បទា។

+ ជនចាស់ជរា ត្រូវមានអាយុចាប់ពី៦០ឆ្នាំឡើងទៅ មានបណ្ណសមធម៌ច្បាប់ដើម មានសុពលភាពចេញដោយក្រសួងផែនការ និងអត្តសញ្ញាណបណ្ណសញ្ញាតិខ្មែរ សំបុត្រកំណើត ឬសំបុត្របញ្ជាក់កំណើត ដែលជាឯកសារផ្លូវការបញ្ជាក់ពីអាយុ។

+ អ្នកផ្ទុកមេរោគអេដស៍ និងជំងឺអេដស៍ មានព័ត៌មាននៅក្នុងប្រព័ន្ធទិន្នន័យអត្តសញ្ញាណកម្មគ្រួសារក្រីក្ររបស់ក្រសួងផែនការ ដែលបញ្ជាក់ថាជាអ្នកផ្ទុកមេរោគដស៍ និងជំងឺអេដស៍។

សមាជិកគ្រួសារជាជនងាយរងគ្រោះ ដែលមានលក្ខខណ្ឌចុះឈ្មោះចូលកម្មវិធីលើសពីមួយ (មានឯកសារចុះឈ្មោះចូលកម្មវិធី តាមប្រភេទក្រុមគោលដៅ) អាចចុះឈ្មោះចូលកម្មវិធីបាន តាមចំនួនប្រភេទអ្នកទទួលផល ដើម្បីទទួលបានលើសពីមួយនៃការឧបត្ថម្ភ។