សមាជិកគ្រួសារដែលមានបណ្ណសមធម៌មានសុពលភាព ត្រូវទៅផ្ទៀងផ្ទាត់ក្នុងកម្មវិធីនៅសាលាឃុំ សង្កាត់ណាមួយក៏បាន។ ករណីបណ្ណសមធម៌ មិនមានបិទរូបថត ត្រូវយកភ្ជាប់ជាមួយនូវអត្តសញ្ញាណប័ណ្ណសញ្ជាតិខ្មែរ សៀវភៅគ្រួសារ ឬសៀវភៅស្នាក់នៅ។ ករណីដែលគ្រួសារមិនអាចមកផ្ទៀងផ្ទាត់ឈ្មោះបាន អាចឱ្យតំណាងស្របច្បាប់ដែលទទួលស្គាល់ពីមេឃុំ ចៅសង្កាត់ មកផ្ទៀងផ្ទាត់ឱ្យខ្លួនបាន។

ក្នុងអំឡុងពេលផ្ទៀងផ្ទាត់នៅសាលាឃុំ សង្កាត់ សមាជិកគ្រួសារដែកមានបណ្ណសមធម៌នឹងទទួលបានការជូនដំណឹងពីចំនួនប្រាក់ឧបត្ថម្ភសរុបប្រចាំខែ កាលបរិច្ឆេទនៃការបើកប្រាក់បន្ទាប់ ការបើកប្រាក់នៅបញ្ជរវីង និងការយកបណ្ណសមធម៌ទៅជាមួយនៅពេលបើកប្រាក់។

នៅខែបន្ទាប់​ សមាជិកគ្រួសារណាម្នាក់ដែលមានបណ្ណសមធម៌ និងមានឈ្មោះក្នុងបណ្ណ អាចបើកប្រាក់ឧបត្ថម្ភនៅតាមបញ្ជរវីងណាមួយ ដោយយកមកជាមួយនូវបណ្ណសមធម៌។ ភ្នាក់ងារធនាគារវីង ត្រូវផ្ទៀងផ្ទាត់លេខគណនីធនាគារ តាមលេខបណ្ណសមធម៌ ហើយអ្នកទទួលផលវាយលេខកូដសម្ងាត់គណនីរបស់ខ្លួន និងថតរូបអ្នកបើកប្រាក់ដោយមានកាន់បណ្ណសមធម៌ រួចបញ្ជូលរូបថតទៅក្នុងប្រព័ន្ធបច្ចេកវិទ្យាគ្រប់គ្រងព័ត៌មាន មុននឹងផ្តល់ប្រាក់ជូនអ្នកទទួលផល។ ចំណាំ៖ សមាជិកគ្រួសារដែលមានបណ្ណសមធម៌ មិនអាចឱ្យអ្នកដទៃក្រៅពីសមាជិកគ្រួសារដែលមានឈ្មោះក្នុងបណ្ណ ឬតំណាងស្របច្បាប់ ដែលទទួលស្គាល់ពីមេឃុំ ចៅសង្កាត់ ទៅបើកប្រាក់ឧបត្ថម្ភជំនួសខ្លួនឡើយ។ ករណីអនុវត្តផ្ទុយពីនេះ អ្នកប្រព្រឹត្តនឹងទទួលខុសត្រូវចំពោះមុខច្បាប់ជាធរមាន។