នៅរសៀលថ្ងៃពុធ ទី២៤ ខែមិថុនា ឆ្នាំ២០២៦៖ ឯកឧត្តម ស៊ឹម សុធន ប្រតិភូរាជរដ្ឋាភិបាលទទួលបន្ទុកជាអគ្គនាយកមូលនិធិជាតិជំនួយសង្គម បានទទួលជួបពិភាក្សាជាមួយអ្នកជំនាញការរបស់អង្គការ ILO អំពីការផ្តល់ធាតុចូលសម្រាប់ការត្រួតពិនិត្យចំណាយគាំពារសង្គម។

នៅក្នុងជំនួបនេះបានផ្តោតលើការត្រួតពិនិត្យចំណាយគាំពារសង្គមក្នុងបរិបទប្រទេសកម្ពុជា ដែលអង្គការ ILO បាននិងកំពុងអនុវត្ត ជាផ្នែកមួយនៃកាតាលីករសាកលស្តីពីការងារសមរម្យ និងការគាំពារសង្គម (Global Accelerator on Jobs and Social Protection)។ ការត្រួតពិនិត្យចំណាយគាំពារសង្គម (SPER) នឹងពិនិត្យមើលលើកម្រិត និងការវិភាជន៍ចំណាយសាធារណៈសម្រាប់វិស័យគាំពារសង្គម និងការវាយតម្លៃអំពីសង្គតិភាពទៅនឹងយុទ្ធសាស្ត្រ និងគោលដៅរបស់ប្រទេសកម្ពុជា ព្រមទាំងព្យាករអំពីតម្រូវការហិរញ្ញប្បទានសម្រាប់ការពង្រីកវិសាលភាពកិច្ចគាំពារសង្គមទៅក្រុមគោលដៅដែលពុំទាន់ទទួលបានការគ្របដណ្តប់។